«САНҰР» телеарнасының оператор-монтажеры
Ғани Оралбайұлы жайлы сыр
БАҚ саласында телерадио хабарларын таратудың мәні де, маңызы да жоғары. Күнделікті ақпаратты оқырмандарға жылдам, жедел жеткізуде әлеуметтік желімен жарыса жұмыс істеп, ұшқырлық танытуда телеарна журналистеріне жүктелер жауапкершілік аз емес. Осы орайда, жергілікті «САНҰР» телеарнасының журналистері, оператор-монтажерлары, дизайнер-монтажерлары, диктор-жүргізушілері табандылықпен, жемісті жұмыс істеп келеді.
Осы телеарнада 2017 жылдан бері оператор-монтажер болып істейтін Ғани Оралбайұлы Бекбаев тәжірибелі, білікті, іскер маман. Ғанидың қос бірдей мамандығы бар. Ол – биолог, әрі фармацевт. Солай бола тұра, жүрек қалауымен телеарна қызметін таңдады. Бұл салаға қызығушылығының оянғаны қызықты жәйт. 2016 жылы Ресейдің астанасы Мәскеуде Федор Бондарчуктің сценарийімен жазылған «Притяжение» фильміне ассисент болып жұмысқа қабылданды. Осында қызмет еткен екі жылда кино түсіру, телехабар сюжеттерін дайындаудың қыр-сырына терең қанықты.
– Мектеп кезінен кино түсіруге, оқиға жазуға қызығатын едім. Режиссер болу ең басты арманым болатын. Алайда, алғашқы еңбек жолым фармацевтика саласында басталды. Бұл салада сегіз жыл еңбек етіп, дәрі-дәрімектердің қоймаға келуі, оларды қабылдап, дәріханаларға жіберудің қыр-сырын үйрендім. Алматыда жұмыс жасап жүргенде екі серіктес болып фармацевтикалық компания ашуға бел будық, біраз жоспарларымызды іске асырып, серіктес екеуміздің көзқарасымыз өзгеріп, келісімге келе алмай жұмысымызды тоқтаттық.
Бала кездегі арманымды орындау мақсатында Мәскеудегі досыма хабарласып «Режиссура» мамандығын оқимын деп шештім. Мәскеуге жеткен соң досыма хабарласып ем, ол Фёдор Бондарчуктың «Притяжение» фильмі түсірілімінде ассистент болып жүр екен. Досым маған: «Осы фильмнің жобасын аяқтайық, кейін оқи бересің, қанша дегенмен тәжірибе жинаған дұрыс қой» — деп кеңес берді. Сонымен ол жақта көптеген дүниені көріп өзіме мол тәжірибе жинадым.
Мәскеуде жүргенімде анам — «Әкең ауырып жүр, ыңғайы болса ауылға қайтқаның дұрыс еді» деп хабарласты. Перзенттік міндетім деп ауылға лезде қайттым. Ауылда екі айдай болып, әкем жақсы болғаннан кейін, «Ер азаматқа тек жүру жарамас» деп жаныма жақын жұмыс іздей бастадым. Бала кезімізден көретін «САНҰР» телеарнасына оператор-монтажер болып жұмысқа орналастым. Мұнда да әлеуметтік бейнероликтер, қысқа метражды роликтерге сценарий жазып, түсірілімін, монтажын да өзім жасап тәжірибе жинақтай түстім. «Адам баласы үздіксіз дамып отыру керек» деп бекер айтылмаған. Ешқандай туысым, досым, танысым жоқ жерге барайын» деп шештім. Менде өзімді дамыту мақсатында 2021–2023 жылдар аралығында Тараз қаласындағы «77 ТВ» телеарнасына ауыстым. Мұнда маман тапшы, кадр жетіспейді екен. Сонымен жұмысқа орналасып үш монтажер істейтін жұмысты жалғыз өзім істедім. Ол жақта да абыроймен Тараз қаласына сыйлы болып, жұмыс атқарып, мол тәжірибе алып қайтқан жайым бар.
Қазіргі таңда «САНҰР» телеарнасына оператор-монтажер болып істеп, Мақтаарал, Жетісай, Шардара аудандары бойынша телехабарлар түсіріп, оны эфирге шығаруға өз үлесімді қосып келемін. Қазіргі күні ақпарат таратуда интернеттегі сайттарға, әлеуметтік желілерге ілесіп жұмыс істеу оңай емес. Өңіріміздегі игі істерді дәріптеп, проблемаларды ашық көрсетуге күш салып келеміз. Ең басты мақсатымыз – шынайы өмірді көрсету, көрерменнің көңілінен шығатын тұшымды хабарлар, сұхбаттар, репортаждар дайындау, – дейді Ғани Оралбайұлы.
О.ҚАЛДЫБАЙ.
