Рәміздер күніне орай еліміздің барлық өңірінде Мемлекеттік туды көтеру рәсімі өтіп, Мемлекеттік гимніміз шырқалды. Аталған шараға Мақтаарал ауданының мемлекеттік қызметшілері де белсене атсалысып, Мемлекеттік туға қарай сап түзеді.
Іс-шара барысында аудан әкімі Бақыт Асанов аудан жұртшылығын айтулы мерекемен құттықтап, ізгі тілегін арнады. Санамызға тәуелсіздік идеясын орнықтырып, патриотизмді қалыптастыруда, ұлттық бірлікті нығайтуда ерекше мәнге ие Мемлекеттік рәміздеріміздерге құрметпен қарау — патриотизмнің асқан белгісі екенін аудан басшысы атап өтті.
«Баршаңызды 4 маусым – Қазақстан Республикасының Мемлекеттік рәміздер күнімен шын жүректен құттықтаймын! Мемлекеттік рәміздер – біздің сонау ғасырлар қойнауынан сыр шертер тағылымды тарихымыздың шынайы көрінісі. Оның мазмұнды нышандары кешегі өткенімізді айшықтап, ертеңгі мақсатымызды айқындап тұр. » — деді Бақыт Насырханұлы.
Мырзакент кентінің орталық алаңында өткен салтанатты шарада мемлекеттік қызметшілер мен тұрғындар Әнұранымызды шырқап, бір-бірлерін мерекемен құттықтасты. Аудан өнерпаздары концерттік бағдарламаларын ұсынып, көпшілікке мерекелік көңіл-күй сыйлады.
