Өткен дүйсенбі күні түркі халықтарының мәдени және рухани мекені – қасиетті Түркістан шаһарындағы облыстық «Фараб» әмбебап ғылыми кітапханасында облыс әкімдігінің ұйытқы болуымен «Түркістан таланттары» жобасы аясында Қазақстан Жазушылар одағының мүшесі, ақын, жазушы, драматург, халықаралық «Алаш» әдеби сыйлығының лауреаты, Ресейдің Халықаралық психология академиясының Құрметті мүшесі, мәдениет саласының үздігі, Созақ, Мақтаарал және Бәйдібек аудандарының Құрметті азаматы Сабырбек Олжабаймен «Қажымас қаламгер» деген тақырыпта оқырмандармен кездесу кеші өтті.
Әдеби кешті Қазақстан Жазушылар Одағы Түркістан облыстық филиалының төрағасы, ақын Айдар Сейдазым ашып жүргізіп отырды. «Түркістан облысы таланттарға бай өлке. Жиырмаға тарта қаламгердің шығармашылығын елге, жас ұрпаққа кеңінен таныстыру мақсатында Түркістанда әрбір ақын, жазушылармен облыстық кітапханада арнайы кездесу кешін өткізудеміз. Бұл игі бастамаға Түркістан облысы әкімінің орынбасары Бейсенбай Тәжібаев үлкен қолдау білдіріп, зор ықылас танытып отыр. Бүгінгі кешіміздің қонағы – Сабырбек Дәніқұлұлы әмбебап, сегіз қырлы, бір сырлы талантты қаламгер»,- деді А.Сейдәзім. Теріскейде, Созақ ауданында туып-өсіп, еңбек жолын аудандық газеттен бастаған С.Олжабай оқырмандарға алдымен уытты сатиралық шығармаларымен танылды. Сатира сардары Садықбек Адамбековтен бата алған Сабырбектің «Ашутас», «Мүсәтір», «Емеурін», «Ұрланған тауық туралы хикая», «Жалдамалы құда», «Ақырзаманның ауруы», «Ғасыр машақаты» атты сатиралық туындылары елді елең еткізді. Юморға, әзілге, шымшып алар сынға толы өлеңдері мен әңгімелерін оқырман іздеп жүріп оқитын болды.
Бұдан соң жазушының «Жылы бұлақ», «Ақсақ Темірдің алмас қылышы», «Ақ ілгек» атты прозалық кітаптары және «Ай астындағы ару» поэзиялық туындылары талғампаз оқырманның жүрегінен орын тапты. Балаларға арнап жазған «Бақыт құсы» атты ертегілер жинағы да өзінің лайықты бағасын алды.
Әдебиеттің алуан жанрында қалам тербеп келе жатқан С.Олжабайдың «Қара көзілдірікті келіншек» драмасы еліміздің Павлодар, Атырау, Батыс Қазақстан, Жамбыл және Жетісай театрларында сахналанды. «Тұмарға тұмшаланған тағдыр» пьесасы Шаян халық театрында сәтті қойылып, көрерменнің ыстық ықыласына бөленді. Ал, қазіргі кезде «Тісіңнен шығарма, Тымпи» атты комедиясы облысымыз театрында қойылуда.
Кеш қонақтары алдымен С.Олжабайдың өмірі мен шығармашылық жолы туралы бейнероликті көріп, кітап көрмесімен танысты. Бұдан соң облыстық «Балалар мен жасөспірімдер» орталығының «Көркемсөз үйірмесінің» мүшелері ақынның өлеңдерін мәнерлеп жатқа оқыды. Атап өтерлігі, облыстағы 17 ауданның кітапханашылары «ZOOM» платформасы арқылы тікелей эфирге қосылды.
Басқосуда филология ғылымдарының докторы, профессор, «Түркі әлемінің үздік педагогы», Қазақстанның Құрметті азаматы, әдебиетші ғалым Сейдулла Садықов «Ақсақ Темірдің алмас қылышы» атты романы шеберлікпен жазылған, құнды тарихи туынды екенін тілге тиек етті. Мақтарал ауданы әкімі баспасөз қызметінің жетекшісі Дінмұхаммед Аязбеков Сабырбек ағаның Мақтааралға еңбегі зор, 2020 жылы мамыр айында орын алған су апатына байланысты тарихи деректі кітап шығару туралы бастама көтеріп, «Мақтаарал: Біз біргеміз!» атты 340 беттік кітапты шығаруға белсене атсалысты-деді. М.Әуезов атындағы университеттен ғалым Ләззат Тұрабекова, Созақ ауданы, Құмкент ауылдық округінің әкімі Ерзат Балықбаев, аудандық «Мақтаарал» газетінің бас редакторы Сәбит Қалдыбаев, қоғамдық ғылымдар академиясының академигі Тағабек Әліпбаев, мәдениет саласы қызметкерлері облыстық кәсіподақ комитетінің қызметкері Қанытбек Исаев, жетісайлық ақын, журналист Камалбек Ортаев т.б. сөз сөйлеп, қаламгер С.Олжабайдың шығармашылық қырына кеңінен тоқталып, дарын иесінің туындыларын жоғары бағалады.
ҚР Білім беру ісінің үздігі, шардаралық ақын Нұрғали Ибрайым қаламдас, сыйлас досы Сабырбек Олжабайға арнаған өлеңін оқыды.
Жыр елінде бірге өстік,
Қиял деген гүл кештік.
Арамыз алыс болса да,
Тілектес оймен тілдестік.
Қатарында тырнаның,
Көтерілді қырда әнім.
Теріскейден жетеді,
Желмен ойнап жырларың.
Шырайын төгіп шыңдардың,
Шыңдардан қолды бұлғадың.
Қаратаудан шығады,
Қаратау тектес шын дарын.
Тасжүректерді еріттің,
Тар пейілдерді кеңіттің.
Адалдықтарға ат қосып,
Әділетсіздерден жеріттің.
Жаныңа қуат, арға-сын,
Қаламың, досым, талмасын.
Біздегі таза жүректі,
Жаңа толқындар жалғасын,-деп тебіренген ақын таланттарды тірісінде бағалап, оларды аялаған облыс әкімдігіне, «Фараб» әмбебап кітапханасы ұжымына ризашылығын білдірді.
Шығармашылық кеште С.Олжабай М.Әуезов атындағы университет ректораты мен облыстық мәдениет басқармасының Алғыс хаттарымен марапатталды. Шара соңында С.Олжабайдың өзі құрастырып, әдеби өңдеген «Шыңдалып өскен жылдарым» (Авторы Зоя Бектаева) кітабының тұсаукесері өтіп, лентасы қиылды. Сондай-ақ, шығармашылық кешті жоғары дәрежеде ұйымдастырғаны үшін Түркістан облыстық «Фараб» әмбебап ғылыми кітапханасының директоры Жанат Шардарбекова, бұқаралық-көрмелік іс-шаралар секторының меңгерушісі Пернекул Налтаева және оқу залының сектор меңгерушісі Перизат Таңатқызы облыстық «Оңтүстік Қазақсан» қоғамдық-саяси газетінің бас редакторы Абай Балажанның Құрмет Грамотасымен марапатталды.
С.Олжабай шығармашылық кешінде облыстық балалар мен жасөспірімдер орталығының өнерлі өрендеріне өзінің кітабын тарту етті.
Сәбит ҚАЛДЫБАЕВ.
